حضرت  مولوی محمد انوارالدین صدیقیؒ

از:

مولوی محمد اعظم الدین صدیقی قدیریؒ

(سابق جائنٹ ڈائرکٹر محکمہ سوشیل ویلفیر حکومتِ آندھرا پردیش)

                                                                                            حضرت محمد انوارالدین صاحب  صدیقی قدیری کا تعلق حیدرآباد کے ایک نہایت ممتاز علمی مشائخ خاندان سے تھا۔آپ بحرالعلوم حضرت علامہ محمد عبدالقدیر صدیقی  ؒ کے نوا سہ، مرید اور خلیفہ تھے۔ حضرت بحرالعلومؒ کی منجھلی صاحبزادی حضرت خدیجہ بیگم صاحبہ آپ کی والدہ اور حضرت بحرالعلوم کے بھتیجے مولوی محمد انورالدین صاحب صدیقی آپ کے والد تھے۔

                                                                                                                                                                                                                                                                                                                                                                                مکمل تعلیم کے بعد آپ نے پیشہ درس و تدریس اختیار فرمایا اور شہر حیدرآباد کے مختلف مدرسوں پر آپ نے تعلیم دی۔ کچھ عرصہ کے  بعد آپ کا تقرر صرفہ خاص کی فوج میں بحیثیت لیفٹیننٹ عمل میں آیا اور آپ بحیثیت کیپٹن وظیفۂ حسن خدمت پر سبکدوش ہوئے ۔

                                                                                                                                                                                                                         عوائلِ عمری سے علمی ذوق رکھتے تھے اور یہ ذوق آپ کی آخر زندگی تک برقرار رہا۔علم تفسیر، قرآن و تجوید اور حدیث کی تکمیل آپ نے اپنے عم محترم شیخ الحدیث علامہ حضرت ابوتراب علی صدیقیؒ (جانشینِ ثانی حضرت بحرالعلوم حسرتؒ)کے پاس کی۔

                                                                                                                                                                                                                                                                                                                                                                                                                                                                                                                                                                                                             آپ نے مختلف علوم پر اور خصوصاً تصوّف پر کتابیں تصنیف کیں، اس کے علاوہ صحابہ، تابعین، تبع تابعین اور اسلامی غزوات پر بھی کتابیں لکھیں جو معلومات کا ذخیرہ ہیں۔ آپ نے حضرت بحرالعلومؒ کی سوانحِ حیات پر ایک ضخیم کتاب مرتب کی۔اس کے علاوہ بھی آپ نے تاریخِ شمسیہ جو حالاتِ خاندانِ صدیقی پر مشتمل ہے، اس کو مزید تفصیلات اور نایاب شجروں سے مزین فرمایا۔ جوکہ ایک عظیم کارنامہ ہے لیکن ابھی اس کی کتابت اور طباعت ہو نا باقی ہے۔

                                                                                                                                                                                                                                                                                                                                                  آپ نے اپنے نانا اور مرشد حضرت بحرالعلوم حسرتؔ صدیقیؒ کے وصال کے بعد سے مختلف دینی اجتماعات ، ذکر و شغل کی محفلوں کی پابندی کا اہتمام فرمایا، جو اب تک بھی اسی اہتمام سے انجام پاتی ہیں۔ اور سینکڑوں مریدین، معتقدین اور ذی علم حضرات شرکت سے مشرف ہوتے رہے، انشاءاللہ سلسلۂ فیض ان کے خاندان کے افراد کی سرکردگی میں جاری و ساری رہےگا۔ آپ کے مریدین ہزاروں کی تعداد میں ہیں۔جن میں ڈاکٹرس، انجنیئرس، لائیرس، لکچررس، اساتذہ، تاجر پیشہ افراد  کثیر تعدادمیں شامل ہیں۔

                                                                                                                                                                                                                                                                                 آپ نے فریضئہ حج و زیارت کا ارادہ فرمایا اور اپنی اہلیہ محترمہ کے ساتھ حج کی سعادت حاصل کی۔ دورانِ حج آپ کی طبیعت ناساز ہوئی اور سلسلۂ علاج مکہ شریف کے سرکاری دواخانہ میں جاری رہا، بالآخر ۲۹ ذی الحجہ ۱۴۱۱ھ(سعودی کیلنڈر کے مطابق) پنجشنبہ بعمر ۷۰ سال داعیٔ اجل کو لبیک کہا۔  انّا للہ و انّا الیہ راجعون